Tadam

Maxfiylik siyosati

Oxirgi yangilanish: 25-avgust 2026

Eng muhim to'rt narsa:

1. Albomingizni havolaga ega bo'lgan har kim ko'ra oladi. Parol yo'q.

2. Suratlar 60 kundan keyin o'chadi — qaytarib bo'lmaydi.

3. Ro'yxatdan o'tmaysiz: ism, e-pochta, telefon, parol so'ralmaydi.

4. Suratlaringiz sotilmaydi, reklamaga berilmaydi, boshqa hech kimga uzatilmaydi.

Qanday ma'lumot yig'iladi

Faqat xizmat ishlashi uchun zarur bo'lgani:

Suratlar — mehmonlar albomga qo'shgan fayllar.
Albom nomi va sanasi — albom yaratganda o'zingiz yozasiz.
Boshqaruv kaliti — tasodifiy belgilar qatori, albom egasini tanish uchun.

Akkaunt tizimi yo'q, shuning uchun ism, e-pochta, telefon raqami va parol umuman so'ralmaydi va saqlanmaydi.

Albomni kim ko'ra oladi

Buni aniq bilib qo'ying, chunki ko'pchilik buni noto'g'ri tushunadi:

Albom havolasi yoki QR kodi bo'lgan har qanday odam suratlarni ko'ra oladi va o'zi ham rasm qo'sha oladi. Bu ataylab shunday — mehmon ro'yxatdan o'tmasdan rasm qo'shishi kerak.
Havola tasodifan topilmaydi: albom identifikatori 9 ta tasodifiy belgidan iborat.
Albom sahifalari qidiruv tizimlariga yopilgan (robots.txt), shuning uchun Google'dan topilmaydi.
Barcha suratni ZIP qilib yuklab olish uchun boshqaruv kaliti kerak — u faqat albom yaratgan odamda bo'ladi.
Xizmat egasi — ya'ni Maqsudjon — yaratilgan albomlar ro'yxatini (nomi, sanasi, surat soni) ko'radi va kerak bo'lganda albomni ocha oladi. Bu yangi ruxsat emas: har qanday xizmat egasi o'z serveridagi ma'lumotga baribir kira oladi, biz buni shunchaki yashirmayapmiz. Bu ro'yxat xizmat ishlashini kuzatish va yordam berish uchun ishlatiladi.

Ya'ni havolani kimga berganingizga e'tibor bering. Ochiq guruhga tashlasangiz, o'sha guruhdagi hamma ko'radi.

Suratlar qayerda va qancha saqlanadi

Suratlar Cloudflare R2 saqlash xizmatida turadi.
Albom yaratilgan kundan 60 kun ochiq turadi.
Muddat tugagach suratlar avtomatik o'chiriladi. Zaxira nusxa saqlanmaydi — o'chgandan keyin tiklab bo'lmaydi.

Shu sababli albomni yopilishidan oldin yuklab olib qo'ying.

Suratlar yuborilishidan oldin nima bo'ladi

Rasm sizning telefoningizning o'zida kichraytiriladi — eng uzun tomoni 1920 nuqtagacha. Serverga faqat shu kichraytirilgan nusxa boradi, asl o'lchamdagi fayl yuborilmaydi.

Bu bir foydali yon ta'sirga ega: kichraytirish jarayonida rasmdagi texnik yozuvlar (jumladan GPS koordinatalari) tushib qoladi.

Istisno: brauzer faylni o'qiy olmasa (masalan Android'dagi Chrome ba'zi HEIC fayllarni o'qiy olmaydi), rasm yo'qolmasligi uchun asl fayl yuboriladi. Bunday holatda faylning ichidagi texnik yozuvlar ham saqlanib qoladi.

Uchinchi tomon xizmatlari

Cloudflare — saytni va suratlarni saqlaydi hamda yetkazadi. Har qanday internet xizmati kabi, so'rovlarni qayta ishlash uchun IP manzillarni ko'radi.
GoatCounter — tashriflar sonini sanaydi. Cookie ishlatmaydi. Yig'adigani: sahifa manzili, qaysi saytdan kelgani, brauzer va tizim nomi, davlat, til va ekran kengligi. Takroriy tashrifni ajratish uchun IP va brauzer nomi faqat xotirada, 8 soatgacha ushlanadi va bazaga yozilmaydi.
Google Fonts — sahifadagi shrift Google serveridan yuklanadi, ya'ni brauzeringiz Google'ga so'rov yuboradi va Google IP manzilingizni ko'radi.

Suratlaringiz bu xizmatlarning hech biriga tahlil yoki reklama uchun berilmaydi.

Brauzeringizda nima saqlanadi

Akkaunt yo'qligi uchun yaratgan albomlaringiz ro'yxati va boshqaruv kaliti brauzeringizning localStorage xotirasida (tadam.albums) saqlanadi. Bu faqat sizning qurilmangizda qoladi.

Brauzer ma'lumotlarini tozalasangiz yoki boshqa telefondan kirsangiz, albom ro'yxati ko'rinmaydi. Shuning uchun boshqaruv havolasini o'zingizga (masalan Telegram'dagi «Saqlangan xabarlar»ga) yuborib qo'yish tavsiya etiladi.

Tadam kuzatuv cookie'laridan foydalanmaydi.

Rasmni o'chirish

Suratni albomning o'zidan o'chirish mumkin. Rasmni ochib, chap yuqoridagi savat belgisini bosing va tasdiqlang — surat ham, uning eskizi ham darhol o'chadi va qaytarib bo'lmaydi.

Kim nimani o'chira oladi:

Albom egasi — boshqaruv sahifasidagi «Ko'rish va rasm o'chirish» tugmasi orqali kirsa, albomdagi istalgan suratni.
Mehmon — faqat o'zi qo'shgan suratlarni va faqat o'sha suratni yuborgan brauzerdan. Brauzer ma'lumotlari tozalansa yoki boshqa telefondan kirilsa, bu imkoniyat yo'qoladi.

Sizga tegishli surat albomda turgan bo'lsa va uni o'zingiz o'chira olmasangiz — albom havolasi bilan birga aloqa sahifasidagi manzillar orqali yozing, qo'lda o'chiriladi.

Har qanday holatda, butun albom 60 kundan keyin o'z-o'zidan o'chadi.

Bolalar suratlari

To'y albomida bolalar ham tushadi. Boshqa mehmonlarning, ayniqsa bolalarning suratini qo'shishdan oldin ularning oilasi rozimi — shuni o'ylab ko'ring. Bu qonuniy talab emas, oddiy odob.

O'zgarishlar

Bu sahifa o'zgarsa, yuqoridagi sana yangilanadi. Xizmat ishlashi jiddiy o'zgarsa, o'zgarish nima ekani shu yerda yoziladi.

Aloqa

Tadam'ni Maqsudjon Polatov yuritadi. Savol, shikoyat yoki o'chirish talabi bo'lsa — maqsudjon.com da aloqa manzillari bor.